AtuartigukMúte Royal Greenlandip angusai pillugit: Naammaginanngitsorujussuuvoq
Nassiussisuuvoq: Naalakkersuisut Siulittaasuata Naalakkersuisoqarfia
Naalakkersuisut Siulittaasuata Múte Bourup Egedep Royal Greenlandip ukiumi angusai naammaginngitsorujussuuai.
”Royal Greenlandip angusat saqqummiussai naammaginanngitsorujussuupput. Niuerfiit kiisalu ataatsimut isigalugu akigititat nikerarnerat Royal Greenlandip akuersaarnanngitsunik angusaqarneranut pisooqataagaluarpataluunniit.
Royal Greenland A/S-imut Kalaallit Nunaat aallaaviusoq aammalu suliffeqarfiup ukkassinera, sapinngisamik annertunerpaamik Kalaallit Nunaannut aningaasarsiortitsinerulerluni, Kalaallit Nunaanneersunik nioqqutissiassaniissasoq, Naalakkersuisut arlaleriarlutik erseqqissartarpaat.
”Naalakkersuisut paasivaat amigartooruteqarnerup ilarujussua Royal Greenlandip Amerikami Kujallermi aningaasaliinerineersuusoq. Tamanna naammaginanngilluinnarpoq, taamaattumillu Naalakkersuisut naatsorsuutigaat Royal Greenlandimi maannakkut aqutsisut Royal Greenlandimi pissutsit iluarsinissaannut iliuuseqassasut aammalu ingerlatseqatigiiffiup pissusissamisoortumik inissisimaffia immikkut ukkatarissagaat – tassalu Kalaallit Nunaat aamma Atlantikup Avannaa”.
Aammalu Naalakkersuisut Siulittaasuat, Múte Bourup Egede, nangippoq:
”Maluginiarpara aqutsisunngortut suliffeqarfiup ilusiligaanerata allanngortinnissaanut kiisalu aaqqissuussaanerup sunniuteqarluarnerulersinnissaanut, suliniuteqalersimasut. Taamaattumik naatsorsuutigaara Royal Greenlandip suliffeqarfik sapinngisamik piaarnerpaamik siumut aallarteqqissagaa kiisalu suliniutissat, nunani allani aningaasaliinernit sunnertianermik annikillisitsisussat, aallartissagai aammalu akiitsut annikillisinnissaat kiisalu Royal Greenlandip Kalaallit Nunaanni sulinerani aningaasaliinerit ukkatarissagai. Royal Greenland Kalaallit Nunaanni innuttaasunit pigineqarpoq aammalu tamanna, tunisassiornermut aqutsinermullu tunngatillugu, aallaavigisussaallugu. Royal Greenland ataatsimeersualerpat Naalakkersuisut piumasaqaatitik saqqummiutissavaat.”
Paasissutissanik annertunerusunik piniarnermi attaveqarfigineqassaaq Naalakkersuisup allattaa Niels Dorph, oqarasuaat 345661, mail: ndor@nanoq.gl